Gwybodaeth ar gyfer y swydd Athro/Athrawes Mathemateg
I gychwyn 01/09/24 – (Swydd Llawn Amser Parhaol)
MANYLION AM YR YSGOL 
Ysgol uwchradd sy’n darparu addysg drwy gyfrwng y Gymraeg i gylch Bangor yw Ysgol Tryfan.  Mae yma 536 o ddisgyblion 11-18 oed ar hyn o bryd, gyda 75 o fyfyrwyr yn y chweched dosbarth erbyn hyn.
Ymhyfrydwn yng nghanlyniadau rhagorol ein disgyblion yn yr arholiadau allanol, y gymdeithas glos a chyfeillgar sy’n bodoli yn yr ysgol a’r sylw unigol a roddwn i ddisgyblion mewn dosbarthiadau bychain wrth gynorthwyo ac ymestyn.
Mae amserlen yr ysgol yn seiliedig ar 6 gwers 50 munud y dydd.
 
Am ragor o wybodaeth ewch i wefan yr ysgol: www.ysgoltryfan.org.   Yno ceir blas ar fywyd yr ysgol a gellir lawrlwytho dogfennau megis prosbectws yr ysgol a’r adroddiad diweddaraf gan Estyn.
 
Datganiad o werthoedd yr ysgol.
 
Yn Ysgol Tryfan amcanir i greu cymdeithas glos, Gymraeg ei hiaith, ble fod pawb-
yn hapus ac yn hyderus;
yn llwyddo hyd eithaf eu gallu ym mhob maes;
yn arddel hunan-barch a pharch at eraill;
yn rhugl yn y Gymraeg a’r Saesneg.
Rhagoriaeth yw nod yr ysgol yn ei holl weithgaredd. Cred yr ysgol mewn bod yn agored ac yn ymatebol.
 
Nodau.
Cynnig addysg o'r ansawdd uchaf posibl i gynorthwyo'r disgybl unigol i ddod i adnabod ei hunan, i feithrin yr adnoddau cynhenid sydd ganddo i eithaf ei allu ac i oresgyn ei wendidau.
 
Creu awyrgylch a fydd yn meithrin ym mhob disgybl berthynas iach gydag eraill, a'i ddysgu i barchu a gwerthfawrogi cymeriadau, talentau a daliadau pobl eraill.
 
Galluogi pob disgybl i ddatblygu i fod yn rhugl yn y Gymraeg a'r Saesneg fel y gall ddod i adnabod a deall y gymdeithas a'r byd y mae'n byw ynddo ac ennyn ymwybyddiaeth o'i wreiddiau, ei gefndir a'i amgylchedd.
 
Amcanion
Datblygu cwricwlwm eang, cytbwys a pherthnasol ar gyfer pob disgybl a fydd yn ateb gofynion y Cwricwlwm Cenedlaethol, polisïau'r ysgol a pholisïau'r AALl.
 
Meithrin a monitro datblygiad pob disgybl drwy'r drefn fugeiliol sy'n bodoli yn yr ysgol i ofalu am les a ffyniant y disgyblion.
 
Paratoi'r disgyblion i feithrin y cymwysterau y byddant eu hangen yn y gymdeithas y deuant yn rhan ohoni ac er mwyn iddynt allu cyfrannu'n gyfrifol iddi.
 
Datblygu cysylltiadau gyda masnach a diwydiannau lleol a chreu perthynas glos gyda'r rhieni, addysg bellach ac uwch a'r gymdeithas yn gyffredinol
 
Y SWYDD 
 
ATHRO / ATHRAWES MATHEMATEG
Swydd Llawn Amser - Parhaol
 
Yn eisiau: ar gyfer 1o Fedi, 2024
 
Gwahoddir ceisiadau am y swydd uchod gan athrawon egnïol a brwdfrydig. Disgwylir i’r sawl a benodir addysgu Mathemateg yng Nghyfnod Allweddol 3 a 4, gyda chyfle i gyfrannu at addysgu Safon Uwch i ymgeisydd priodol.
 
Telir cyflog yn unol â Graddfa Gyflog Athrawon (£30,742 - £47,340) yn ôl profiad a chymhwyster.
 
Mae’r gallu i addysgu trwy gyfrwng y Gymraeg a’r Saesneg yn hanfodol ar gyfer y swydd hon.  Mae’r ysgol yn gweithredu’n unol a’i Bolisi Iaith. Bydd angen i’r ymgeisydd gyrraedd y lefel ieithyddol sy’n cael ei nodi yn y Manylion Person.
 
Gwahoddir unrhyw un sydd â diddordeb a/neu angen mwy o wybodaeth i drafod yn anffurfiol â'r Pennaeth, Dr Geraint Owen Jones.
 
Gellir cyflwyno cais am y swydd yma ar-lein ar wefan Cyngor Gwynedd neu mae pecyn cais i’w cael gan Miss Bethan Thomas, Rheolwr Busnes a Chyllid, Ysgol Tryfan, Lôn Powys, Bangor, Gwynedd, LL57 2TU
(Rhif Ffôn: 01248 352633, e-bost: sg@tryfan.ysgoliongwynedd.cymru)
 
Os dymunir dychwelyd y cais drwy’r post, dylid ei ddychwelyd i’r cyfeiriad uchod erbyn y dyddiad cau.
 
DYDDIAD CAU HANNER DYDD, DYDD MERCHER, MAWRTH 13EG, 2024
Rhagwelir cynnal y cyfweliadau W/C 18/03/24
 
RHAI MANYLION PERSONOL 
 
Dylai’r ymgeisydd llwyddiannus fod:
 
 chymwysterau priodol i arwain y maes yn yr ysgol.
Yn frwdfrydig a chreadigol, er mwyn ysgogi a chynnal diddordeb disgyblion yn y maes.
Yn abl i addysgu’r pwnc i’r ystod oedran llawn.
Yn meddu ar sgiliau TGCh cadarn.
Yn rheolwr dosbarth effeithiol gyda’r sgiliau i sicrhau fod yna awyrgylch gynhaliol yn y dosbarth i hybu’r dysgu.
Yn deall fod disgyblion yn dysgu mewn ffyrdd gwahanol ac felly’n barod i addasu’r addysgu i’w hanghenion.
Yn weinyddwr trefnus gyda’r gallu i gynllunio gwaith a’i orffen; i asesu gwaith yn rheolaidd a chofnodi hynny’n drefnus; i ysgrifennu adroddiadau manwl a pherthnasol.
Yn abl i weithio’n annibynnol a hefyd yn barod i gydweithio fel rhan o dîm.
Yn barod i ymateb i ddatblygiadau pynciol lleol a chenedlaethol yn y maes.
Yn gallu arwain yn strategol ac yn gydwybodol holl agweddau datblygol adran, gan gynnwys yn benodol y cylch datblygu a’r hunan arfarnu.
Yn meddu ar ymwybyddiaeth gadarn o ofynion iechyd a diogelwch yn y gweithle.
 
Swydd Ddisgrifiad Athro Dosbarth:
 
Prif gyfrifoldebau:
Paratoi gwersi pwrpasol, fydd yn ddiddorol, amrywiol o ran cynnwys ac o ran disgwyliadau oddi wrth unigolion.
 
Cychwyn a gorffen gwersi yn brydlon.
 
Ymateb yn gadarnhaol i waith disgyblion.
 
Dangos cydymdeimlad ag amgylchiadau personol unigolyn.
 
Creu awyrgylch symbylus a diddorol yn y dosbarth (a’r coridor) drwy drefnu arddangosfeydd o waith plant a phosteri ar y waliau.
 
Marcio gwaith cartref a dosbarth disgyblion yn unol â pholisi'r Adran.
 
Cadw cofnod manwl o asesiadau (a marciau) y disgyblion .
 
Cadw golwg ar gynnydd y disgyblion.
 
Marcio papurau arholiad a gwaith cwrs disgyblion.
 
Paratoi adroddiadau ysgrifenedig i rieni (yn unol â pholisi asesu'r ysgol).
 
Trafod datblygiad y disgyblion â rhieni mewn Noson Rieni.
 
Disgyblaeth gadarn a chadarnhaol, yn y dosbarth ac o gwmpas yr ysgol.
 
Ymgymryd â Hyfforddiant Mewn Swydd a Datblygiad Proffesiynol parhaus
 
Cyfrannu tuag at Gynlluniau Gwaith, hunan arfarniadau a Chynlluniau Gwella'r Adran.
 
Cyfrannu tuag at lunio polisïau’r ysgol.
 
Cyfrannu tuag at Gymreigrwydd yr ysgol.
 
Gosod disgwyliadau uchel.
 
____________________________________________________